陳嘉桓九十後大平反

無暇拍拖笑對緋聞

Rose出道不久，即傳出不少緋聞，引來不少眼紅她的人惡意中傷，或者直斥她水性楊花，淨係識溝仔！本以為一個小女孩，定必受不了流言蜚語，想不到Rose竟然能夠一笑置之，只顧做好自己。

「其實對於緋聞，真係覺得好神奇！我只係抱住一個工作嘅心態去拍MV，冇諗過件事會變成咁。雖然有好多閒言閒語，不過我都唔會覺得困擾嘅，因為清者自清，件事都唔係真嘅。而且公司都好錫我，幫我出咗聲明澄清，大家誤會都冇辦法。呢啲事都冇得小心，我都係繼續努力做嘢，做好自己本分。

做咗藝人，感情生活會受到大家嘅注視。我依家冇拍拖，不過我唔係因為怕大眾嘅壓力而唔拍，而係真係冇時間。我除咗做嘢之外，仲要練功夫，連家人都好少見！加上事業先啱啱起步，想喺工作方面努力打拚多一陣先！」

陳嘉桓學功夫學了三年，現在她的詠春打得有板有眼。

當眾被設計師掃褲邊，陳嘉桓表面鎮定，但其實是心驚驚。

遇突發事直認心驚

人人都說娛樂圈是個大染缸，年紀輕輕的Rose，所見所聞當然比一般少女多。親身經歷不少突發事情，亦有幸得到前輩的指導及分享，所有事都令她極速成長。

「加入咗娛樂圈，令我嘅眼界擴闊咗好多！喺出席唔同嘅場合，都會有好多突發嘅事情發生。有好多人會問我有關之前設計師Alain Mikli掃我褲邊嘅事。講真，我嗰陣時真係有啲驚。後來睇啲報道都有講番，呢類嘅事都有發生喺其他藝人身上。作為一個女仔，發生呢啲事梗係會唔開心，不過佢應該都冇惡意嘅，都係貪玩。但係我自己以後會更加小心。

其實我以前對做演員冇乜大感覺，但係拍咗《葉問前傳》之後，我了解拍戲多咗。原來一個shot都要拍成幾日！喺電影裏面，我一次過演晒女人嘅一生，由少女到老、由結婚到離婚到自殺，可以試到現實裏面做唔到嘅嘢！而且喺戲入面嘅前輩，好似元彪大哥同洪金寶大哥，佢哋好nice、好肯教新人，仲成日同我講佢哋七小福嗰陣時嘅嘢！真係覺得好得意！宣傳電影嗰陣，又去咗好多唔同嘅地方，令我可以了解唔同地方嘅風土人情！」

以「打女」起家的Rose，原來起初對功夫零認識，入行時只想做一個靚靚模特兒。在機緣巧合的情況下接觸到詠春，令她的意志更堅定，更誓要為九十後少女大平反！以身作則，力證九十後肯捱、肯學、又肯搏！

「其實我以前淨係純粹想做model，覺得可以成日着靚衫、影靚相。面試嘅時候識咗師傅，佢問我有冇興趣學打功夫，我就決定試吓。啱啱學嘅時候其實都幾辛苦！因為我以前好少做運動，拉筋又好痛！不過練咗一排，唔單止個人健康咗，連寒背都改善到，仲瘦咗添！不過最大嘅得着都係教識咗我做人要有毅力，同埋令我知道做嘢唔可以一步登天。」

努力練功打到拗柴

好多人會覺得九十後嘅女仔有公主病、唔捱得。學咗打功夫之後，我明白到如果學咗之後唔練，係一定冇可能成功，一定要的起心肝，慢慢一步步咁學，冇人可以一開頭就打木人樁！詠春一學就學咗三年，一有時間就會去上堂。其實除咗詠春之外，我對洪拳同兵器都有興趣，有機會都想學！

不過打功夫都有好多難忘嘅事，印象最深刻嘅係我第一次拗柴！雖然對好多人嚟講可能冇乜特別，但係我真係覺得好深刻！嗰日喺公司練踢旋風腿，落地嗰吓我隻腳掌向內拗，成個人撻咗落地。嗰陣真係好痛，我不停咁喊！公司同事即刻帶我去醫院睇醫生，本來我之後仲有工作，但係佢都一定要我休息兩日。嗰排隻腳真係腫得好緊要，足足兩個月先好番！」

家有愛犬談心

愛狗如命的Rose，家中有四隻愛犬。當中，黑色的貴婦狗Zero更是家中的新成員！Rose說︰「Zero係早幾個月，我朋友喺街度執返嚟o架。嗰時佢好瘦，仲要成個頭都係傷痕！我即刻帶咗佢去睇醫生，好彩佢好快就康復，依家都肥番晒！我平日遇到咩壓力、咩唔開心嘅事，我都會同我屋企啲狗仔傾，所以佢哋知道我最多秘密！哈哈！」

取代Kelly 獲贈Happy Life

Rose憑其健康形象、甜美外貌，獲不少品牌垂青，就連一直重用陳慧琳（Kelly）的金至尊，都邀請她任代言人。品牌更送她一條名為Happy Life的頸鏈，令Rose驚喜萬分！她說︰「我最鍾意設計簡潔嘅頸鏈，因為易襯衫！而且呢條鏈嘅寓意同我人生嘅宗旨一樣，遇到乜嘢事都要樂觀面對！」

口述：陳嘉桓

筆錄：龔凱欣

攝影：吳文聰

服裝：www.iposh.cc