莊思敏認飛吳浩康

莊思敏(Jacquelin)與歌手吳浩康(Deep)的五年情玩完,昨日Jacquelin從北京返港,記者們早在機場守候。她甫出接機大堂,再親口證實與Deep分手是事實。

Jacquelin說:「我哋實際上分咗手已經兩個星期,其實大家都討論咗一段時間,因為一直都性格不合,成日嗌交,覺得長此下去唔會有好結果,所以覺得都係做番朋友好啲,最後仲作出咗分手呢個沉痛決定。(邊個主動提出分手先?)都冇話邊個先,一路大家都有傾呢個問題,大家都曾經努力挽救過,so far唔成功,最後覺得唔應該等到段關係最爛嗰時先分開。」她又表示二人之前都曾說過分手,但最終因不捨而繼續一起。

唔關第三者事

對於今次分手是否涉及Deep再次染上不良嗜好?Jacquelin就力撐Deep:「久唔久身邊都有朋友會懷疑,佢究竟會唔會再吸毒,但我未見過,亦相信佢唔會囉。(關家庭背景或第三者事?)咁開始嗰時都已經存在家庭背景呢個問題,所以唔會因為咁而分手,更加唔關第三者事。(之前Deep講過話想識第二個女仔喎?)咁佢諗咩我唔知啦。」

當再次追問是否她主動飛起Deep時,Jacquelin就自問自答說:「可唔可以咁講呢?咁雙方都有提出,不過最後落決定嗰個係我。(屋企人支唔支持你嘅決定?)我好少同屋企人講呢啲,對住妹妹都係輕輕帶過。」她還表示自己心情OK,加上最近忙於工作周圍飛,沒有太多時間放在這件事上。

發哥星洲返港

另外,周潤發與老婆陳薈蓮亦現身機場。他們剛從新加坡旅遊返港,發哥笑言此行吃了不少美食,大飽口福。問他知不知鋒芝離婚的事?發哥說:「吓,乜唔係已成定局咩?」

文:名人組