周秀娜飯局掛住食冇得撈

性感女神周秀娜憑32D火辣身材和出位言行成功搶灘,在o靚模群中「脫」穎而出,原來她搏到盡只為養家,雖與父母約法三章:不沾毒、不犯法、不賣身,卻年少無知誤信前經理人兩度「陪客」。

周秀娜(Chrissie)十歲隨父母從潮州來港定居,住在西環舊樓,為減輕家庭負擔,自小做外快賺零用,曾做收銀和派傳單,畢業後做過時裝店員、硬照模特兒和啤酒女郎。她自言因不懂冧客而失掉工作,她說:「我唔鍾意講大話冧客買衫,賣啤酒又唔肯同客人猜枚,梗係冇得撈啦!後來簽公司做Model,有兩次叫我同啲女仔去飯局,公司話席上嘅陌生人係『客』。有啲女仔表現落力,我就呆坐悶食,好無聊唔肯再去,之後就坐冷板。雖然唔開心,但我唔會屈服。」

堅守父母承諾

約滿離開,Chrissie機緣巧合參與電影《出水芙蓉》而認識現任經理人Roy,她說:「我目標係拍戲做演員,但好多公司都只肯簽我做Model,但Roy不但肯捧我拍戲,仲講明唔准陪客,我哋一拍即合。」09年寫真面世後,Chrissie一夜成名,有人出高價約她出埠做伴遊和「溫馨飯局」,她在微博公開拒絕。

談到父母,Chrissie透露第一本寫真集初稿獲父母審批,她說:「佢哋都讚靚,仲訂好多本要我簽埋名送畀鄉下親戚。我一直與父母同住,佢哋每日都幫我剪報,好清楚我嘅事,佢哋信任我從不過問。」09年科大邀請她出席講座,周父一席話令Chrissie充滿信心,她說:「佢話總有人鍾意刁難、批評,只要記住當初點解入行,記得自己嘅夢想,堅守宗旨。而我唔會忘記對佢哋嘅承諾:『不沾毒、不犯法、不賣身』。」

拍戲炒車入院

此外,Chrissie昨在馬來西亞拍攝新戲《紙月亮》時不慎炒車受傷送院,她在微博透露被電單車的排氣管灼傷,美腿又紅又痛,要休息半天。文:專案組 攝:黎志輝 服裝:GUESS