郭羨妮500萬置業未婚夫冇份
郭羨妮（Sonija）明年將下嫁內地武指朱少杰，雖然被指要捱麵包，不過Sonija認為最緊要心中富有。近日她更趁樓市轉淡，以筍價500餘萬元把現居的清水灣半島海景單位轉租為買，揚言未婚夫冇份，她是為了給媽咪一個安樂窩。
無綫花旦Sonija自爆出與內地武指朱少杰撻着後，昔日她跌宕起伏的情路也變得平坦。但有指二人身份懸殊，朱少杰實際收入與Sonija差天共地，Sonija在愛情與麵包的抉擇上，選擇了愛情，更有傳兩口子將於明年三月在泰國華欣舉行婚禮，Sonija從此修心養性。
唔認為朱少杰窮
雖然Sonija與未婚夫分隔中、港兩地，又要籌備婚禮，Sonija仍留意香港樓市動靜，見樓市近日轉淡靜，即出手買樓積極創富。據知，曾於08年置業的Sonija在金融海嘯前醒目離場，轉手便賺了40萬，繼而與母親租住清水灣半島近千呎海景單位。鑑於近日樓市轉吹淡風，加上業主劈價割愛，Sonija即斥資500餘萬元將現居單位轉租為買，以筍價購入上述單位，為將來打算！
據知，朱少杰雖然被指是窮武指，但為了Sonija的將來決心積極搵錢，近日更首次身兼製片和導演，開拍內地劇集《亂世佳人》，又計劃在上海或北京買樓，誓要令未來老婆做中、港兩地業主，不用捱窮。
對於在港置業一事，Sonija在電話中直認此事，但卻不肯透露金額：「唔係太貴，所以買得起。」問是否介意老公被指是窮武指？Sonija聞言笑說：「我唔介意人哋咁講，佢亦都唔會介意，只要心中唔貧窮就得，總之我需要乜嘢、我想食乜佢都畀到我，咁都算窮？」她坦言買清水灣半島並非貼錢築愛巢，只是讓母親有個安樂窩安享晚年：「佢（朱少杰）冇份架，佢要喺大陸發展，唔會成日嚟香港，層樓係畀媽咪嘅。」
明年嫁先賣關子
對於明年出嫁一事，Sonija大賣關子說到時發相就知，他們不想有傳媒騷擾婚禮：「今次只會請親戚，佢哋都唔想畀人影到！」並說明年才計劃生B。此外，早前Sonija趁放假飛往北京探朱少杰，實行冧爆未婚夫。而上月她去日本旅行時，亦於微博向未婚夫報平安，恩愛得令人羨慕。
文：專案組