MJ拒做電燈膽 扮懵撐隊友
Mr.成員MJ和Ronny昨日跟o靚模Jeana（何佩瑜）、日模松岡李那、Hidy等出席3香港智能手機活動，但在日本斷正拍拖的Tom就冇影，MJ接受本報電話訪問時解釋：「佢有嘢做嚟唔到。（Tom同Ronny去日本玩？）佢哋都有叫我去，不過自己喺演唱會使咗好多錢買樂器，所以冇去。（拒做電燈膽？）唔知佢哋有女朋友去喎。（Tom同Leanne斷正？）我都識Leanne，佢幫我哋拍過MV，但真係唔知佢哋拍拖，如果拍拖就認囉，但我唔可以代表佢講嘢。（祝福佢哋？）祝佢哋友誼永固。」
至於日前發誓冇整容的o靚模Jeana昨強調絕非發假誓，又寸其他o靚模：「嗰啲悉尼老鼠（識你老鼠）嗰班朋友，我唔會再理佢哋做咩。（去驗明正身？）我知自己係真材實料，唔係人哋話驗咩我就驗咩，我有時間都做有意義嘅嘢啦！」
