Tom@Mr.陽光妹遊日開餐斷正
Band仔多情！Mr.成員Tom跟o靚模蔡穎恩（Evelyn）分手後，火速戀上Evelyn的死黨「陽光妹」何思諺（Leanne），兩人拍拖蜜遊日本斷正，被拍得在築地甜蜜食壽司，昨日兩人大方公開戀情，Tom更強調Leanne絕非「小三」，極力維護新歡！
昨日本報收到一輯讀者提供的相片，影到Tom和Leanne蜜遊日本築地，與Mr.另一成員Ronny跟圈外女友一行4人拍拖食壽司，只見4人坐在食肆一角，由於發現店內有港人，4人刻意表現低調，戴帽的Leanne雖只看到半邊臉，但她5月開工時已戴過這頂帽子。
不認不認還須認
上月Tom才承認跟Evelyn分手，之後即傳出他戀上Evelyn的好姊妹Leanne，令Leanne被指是「小三」，早前Tom被追問新戀情時，還矢口否認：「我哋係朋友。」事隔不久兩人即在日本蜜遊斷正，Tom終大方向本報承認拍拖：「上月底去嘅，我去咗5日，Leanne喺第3日加入，仲有Ronny同佢女友。」他坦言：「畀人影到我會認，我想保護Leanne，佢唔係第三者，我同Evelyn分開咗3、4個月，Leanne係兩個月前拍MV識，拍咗拖一個月。」
對於Leanne被指是「小三」，Tom為女友呼冤：「佢唔係，我想保護女仔，我好清楚自己做乜，唔係亂嚟，希望大家畀空間我哋。（點解當日否認拍拖？）嗰時啱啱一齊冇耐，同Evelyn分開冇刻意同傳媒交代，亦冇同Leanne有共識要公開，所以唔認，唔係刻意隱瞞，大家千祈唔好誤會，對三方都唔好，唔好搞到三角關係。」
適合時機公開戀情
對於Leanne和Evelyn本身是好姊妹，問兩女會否尷尬？他說：「大家咁大個人識處理，Leanne唔係第三者，我諗Evelyn會明白。（你同Evelyn仲係朋友？）耐唔耐有通電話，keep住聯絡。」他謂跟Leanne拍MV認識，大家興趣近似，今次是兩人第一次去旅行，問是否全包請女友？他說：「唔係，AA制，佢唔畀我請。」問兩人是否同住一房？他尷尬說：「夠啦，唔好玩我。」Leanne亦大方承認：「依家畀人影到承認，係適合時機公開，之前太多負面新聞所以唔認，我唔係第三者，佢哋分手原因唔係我，呢件事我哋三個最清楚，多謝大家關心。」她亦於微博表示：「感到恩惠（欣慰）是明白我的人，一直都在愛着我，謝謝你們。」字裏行間似有所指。
蔡穎恩（Evelyn）
年齡：21歲
身高：164cm
三圍：32B、25、35
簡介：其益力多、麥當勞電視廣告較深入民心，憑後者奪得第15屆十大電視廣告頒獎典禮「最佳電視廣告女主角大獎」，曾參演電影《歲月神偷》及出寫真集。
何思諺（Leanne）
年齡：20歲
身高：165cm
三圍：32B、24、31.5
簡介：憑拍攝陽光檸檬茶廣告成名，有「陽光妹」之稱，除接廣告外亦有出活動行騷。
文：音樂組