莊思明涼浸浸碌波蝦師妹

上屆港姐莊思明及彭慧中，聯同洪天明及吳家樂，昨日到九龍灣E-Max香港保齡球城與應屆14位港姐，分成兩組大打友誼波，低胸Lisa解釋並非有心搶師妹鏡，她說：「今日好熱呀！（你啲師妹發冷？）咁佢哋始終仲選緊，服裝有一定要求，等師姐涼吓！諗番起上年我臨決賽嗰個禮拜，日練夜練，時間表排到好密，今年我就可以純欣賞。（睇好邊個攞獎？）(6)梁麗翹表現幾淡定、得體，(7)胡中慧個樣有啲似楊采妮，(8)蘇文幾大方。（唔鍾意多是非佳麗？）都有留意，我唔會因為呢啲新聞影響對佢哋嘅評價。」

蔡慧欣奪獎激動

M蔡慧欣憑打出全中而被選為「突出表現佳麗」，又與(3)許亦妮、(5)朱晨麗、(6)梁麗翹及(7)胡中慧，成為「最具冠軍相佳麗」網上投票最新五強，蔡慧欣心情略帶激動說：「呢個係我人生第一個獎，好感動！入到網上五強都好開心，增加咗決賽晚嘅信心。（決賽攞獎你會點？）會喊！因為太過開心。」

蔡慧欣（右）獲獎，眾佳麗亦為她高興。	洪天明與吳家樂和佳麗作友誼賽，相處融洽。	許亦妮積極減肥，以最佳狀態出賽。

望簽無綫做藝員

許亦妮則坦言節食修身迎決賽：「我食沙律減肥，（邊個係勁敵？）冇，每一個都質素好，都有機會，自己信心ＯＫ，狀態係沒有最好，只有更好！（傳你一定冇獎，簽無綫做藝員？）寫啫，我唔擔心，我信命數，都想入行，但冇諗得太過長遠，完成比賽先。」

文：影視組