樂瞳找豐胸代言轉型晒肉

憑劇集《點解阿Sir係阿Sir》爆紅的樂瞳，昨以一身學生造型與高海寧及王淑玲出席動漫展活動，成為「肉光四射」的動漫展中的一道清泉，不過她卻笑言有興趣效法高海寧，穿上性感的cosplay服飾：「我見到高海寧着得好勁，如果件衫領高番啲我都想試吓！」

戰衣幾日冇得換

問到一向形象健康的她會否騷胸？她即表示：「我係有限公司，大家都知我冇乜身材，（唧出嚟o架啫？）咁都要有多啲肉先可以唧，希望有豐胸公司搵我啦，（豐胸後先會性感？）係呀！」

同場的高海寧再度穿上大會代言人的性感戰衣上陣，有團體斥性感o靚模入侵動漫展，令活動變成「成人節」，對此高海寧即謂：「我呢套都唔算性感，其實都係跟番漫畫原著。」穿上大會代言人性感服飾多天的高海寧，笑言公司有替她清理衣服，保持衞生。

樂瞳唔晒性感，大玩校服誘惑。

樂瞳與超級巨聲吳業坤手拖手獻唱，台下宅男反應熱烈。

唔認同幟哥撻着

另外，有報道指高海寧早前拍攝飲食節目的拍檔黃永幟對她嗒糖，她即時作出否認，她早前又曾與「少年食神」林澄光傳出緋聞，對於她先後與「食家」傳緋聞，她笑說：「咁我拍親都係飲食節目嘛，同女仔就易傳不和，男仔就傳緋聞！」她又表示雖然喜歡成熟型男士，但對方並不是她的菜。

文：影視組