何超盈街頭受誘報名纖體

近年回港繼續學業的何超盈，與男友Greg感情穩定，加上男友深得賭王及母親梁安琪歡心，愛情得意的她難怪最近心廣體胖不少。

15分鐘豪氣扑錘

日前下午5時許，超盈獨自現身銅鑼灣行街，見她手腳明顯比以前圓潤，當途經街頭一個推銷纖體療程攤位時，即被一名女推銷員鎖定為目標，落足嘴頭Sell足15分鐘，超盈最終揮筆購下療程，相當豪氣！

當超盈轉身離開之際，發現有記者拍照，即友善上前打招呼，問到是否已購買纖體療程？她說：「係呀，其實我有贊助嘅，但係我見佢好慘，咪幫佢簽張單囉。呢排肥咗好多唔想見人呀！多數留喺屋企。」

其後她便到附近餐廳會合妹妹超蓮，當問到有關超雲感情生活時，超蓮表示：「唔方便講喎！」她又表示自己感情未有着落，故相約超盈到美甲店為指甲扮靚。

膽戰心驚存陰影

此外，超盈昨日出席活動時，透露最近與家人及男朋友歐遊，但賭王則未有同行。她表示旅遊時遇到一件難忘事：「有一日坐氫氣球，降落嗰時個氫氣球反咗，我哋瞓晒喺地，我撞親膊頭，真係好驚！以後都唔敢再搭，真係好危險！（男友做護花使者？）都有。（有冇講畀爸爸聽？）有同佢講，佢仲話『都叫咗你唔好坐，好危險！以後都唔好坐啦！』」而超盈表示今次到歐洲未有探望超雲。

文、攝：追蹤組、名人組