蔡楓華撻低甩帽 驚現禿頭

飽受脫髮困擾的蔡楓華(Ken),近年帽不離頭,但前晚在廣州演唱會上撻低甩帽,其地中海禿頭盡現,大出洋相!教他狼狽不堪,可謂男人最痛。

【蔡建輝廣州直擊】蔡楓華前晚在廣州天河體育館舉行演唱會,當日下午4時他先行到場館綵排及在後台拜神,祈求個唱順利。晚上8時15分演唱會揭幕,全場爆滿,演唱會編排跟之前香港個騷差不多,阿Ken在演唱會上先後換了五套服飾,每個造型都配襯各式各樣帽子。

拉羅文落水

當他以一身白馬王子Look造型獻唱《IQ成熟時》,突然不慎自己絆腳撻低,頭戴的白色牛仔帽飛脫,其遮掩多時的地中海禿頭裸露人前,當眾出醜的他雖然尷尬又狼狽,但見他敏捷執起頂帽笠番,並執生屈膝躺在地上繼續唱,唱罷後他才彈起身。

大出洋相的阿Ken自我安慰說:「當年羅文都跌低過起番身,我跌過一次起番身,第二次又起番身,呢次係我第三次跌低,我又起番身,呢啲就係我所講嘅神迹。」雖然之後阿Ken若無其事繼續演唱,但可能有陰影,見他不時用手撳帽,以免再度出醜。

女粉絲攬實

演唱會結束後,大批中女粉絲在場館外守候,她們表現熱情,攬住阿Ken將頭貼在他胸口,令他寸步難行,阿Ken就擺出一副chok樣,但也禮待粉絲。

慶功宴上阿Ken未有受訪,適逢前日是主辦商孫敬安跟盧敏儀的結婚14周年紀念,兩人即開香檳慶祝,並當眾咀嘴大晒恩愛。孫敬安並透露今次是與蔡楓華最後一次合作,雖然阿Ken決定自立門戶,但亦祝福對方前程似錦。