衞詩難見關楚耀呻可惜
關楚耀（Kelvin）與前女友衞詩（Jill）兩年前曾同於日本因藏毒被捕，兩人現已各有新歡，更同樣將經歷出書，鼓勵及警惕年輕人。昨日兩人「前後腳」現身書展簽名會，先於早上舉行分享會的Kelvin得悉Jill將於昨午殺到時，即以忙碌作擋箭牌，避忌表示與對方未有聯絡，雖表示會買對方新書當支持，但拒送書予Jill：「佢自己買啦，佢會支持嘅！」
昨午舉行簽名會的Jill則拖男友Tim及父親Joey Vidal撐場，並大方回應：「好可惜，冇機會見到（Kelvin）添。（冇聯絡？）對上嗰次係我生日，有傳短訊講生日快樂，仲話有機會搵埋大家另一半出嚟食飯，但暫時未食。」Jill又稱兩人未有直接通話，可能時候未到，但坦言期待與對方見面。
