陳柏宇彈上月球過暑假

踏入暑假，同學仔除了吃喝玩樂之外，亦可以趁機做暑期工賺取零用錢或吸取工作經驗。如果可以時光倒流回到年少時，性感女神周秀娜說想當髮型師或化妝師，可邊賺錢邊學扮靚之道，認真夠實際！但最有趣的，莫過於想到太空總署當見習生的陳柏宇，想藉此登上月球放暑假！

陳柏宇：「我想去太空總署做見習生呀！因為我由細到大都對太空好有興趣，想試吓喺無重狀態係點，同埋想上月球！」

楊汀叮：「我想喺海洋公園做海豚訓練員，因為我好鍾意動物，而且天氣熱，可以浸喺水入面工作，有消暑作用。我以前去過日本旭川動物園，同海豚玩咗兩個鐘，佢哋好聰明，好似聽得明你講嘢咁，識跟住你指示做動作。」

楊汀叮	楊汀叮率一眾模特兒參加在海港城舉行的活動。

周秀娜：「想做化妝師或者髮型師，依家都好似做緊咁，因為喺外地拍戲時，都要自己化妝同Set頭，自己識可以慳番啲錢。」

何紫綸：「我想做花農種花！因為我一直都好鍾意玫瑰，每次拍拖我都會要求男友最少送一支玫瑰花畀我，如果我自己做花農，咁我就可以隨便摘花。」

Mandy Lieu：「教鋼琴或者芭蕾舞都好，其實以前喺馬來西亞都教過學生兩年，嗰時畢業後老師有畀學生我教，鍾意見到小朋友成長，好開心，有好大滿足感。」

松岡李那：「我想做海豚訓練員，我覺得海豚好得意，想同佢哋玩，一齊游水，不過游水我唔係好叻。」

樂瞳：「我想去主題公園做巡遊嘅表演員，因為可以帶畀人喜樂，自己又好開心，每日喺嗰度工作應該好放鬆。」

陳法拉：「我想入政府部門工作參與議會決策，因為政府嘅工作同藝人嘅工作好唔同，所以想試吓。」