祖名見吳綺莉大方打招呼
成龍獨子房祖名昨日出席活動，對於有傳吳綺莉回流返港兼主持節目，祖名坦言見到面會大方打招呼，孝順仔的他強調從未埋怨過父親「做錯事」，亦甘願一世為對方「執手尾」，並以「一齊中槍」分擔父親的傷痛。
房祖名昨日與鄧紫棋（G.E.M.）出席麥當勞活動，與數十小朋友耍功夫，功夫了得的祖名駕輕就熟，反觀G.E.M.卻雞手鴨腳 。昨日有報道吳綺莉將帶同愛女吳卓林回流返港定居，並會主持電視節目，更揚言不怕訪問成龍。身為成龍之子的祖名對於一切傳聞淡然說：「冇得點睇同講任何嘢。」
會稱呼「吳小姐」
有傳母親林鳳嬌為此感到不快，祖名說：「唔想講，大家會感受到同諗到，冇聽過媽咪意見。」祖名透露從未與吳綺莉碰面，如見到對方會否尷尬及如何稱呼對方？祖名說：「會打招呼，叫吳小姐，你好。（見到吳卓林呢？）say hi囉。（唔怕媽咪嬲？）呢個係禮貌。」隨即無奈說：「今年第一次見大家就要回應咁凝重嘅問題，呢個我一直都唔想講。」
問到有否嬲父親「做錯事」？父子情深的祖名說：「冇得嬲，一家人，佢做錯嘢、講錯咩佢都係我老竇，會盡力去執佢手尾，一齊中槍囉，佢做錯我都要受，佢有乜我都會中槍。（媽咪中槍最深？）一定啦！」
擺明偏心錫阿媽
祖名又擺明偏心說：「唔好問我父母跌落海救邊個，正常梗係救媽咪。（引以為鑑？）一直都步步為營，老竇嘅面係佢嘅面，我嘅面係父母嘅面，作為仔嘅都唔想佢哋去受。」同場的G.E.M.透露小時候曾學體操，又稱自己筋鬆關節軟。
採訪：音樂組