李晉強口窒窒膺雙料港男

全城女士矚目的《2011香港先生選舉》，昨晚假將軍澳電視城舉行，11位參賽者競逐「香港先生」、「最佳台型大獎」、「最具演藝潛能大獎」及「iMR 大獎」四個獎項。雖然(10)李晉強講嘢口窒窒，但仍獲司儀鄭裕玲力撐「我鍾意聽你講嘢」，加上在才藝表演大晒魔術冧女，令他勇奪「最佳台型大獎」及「香港先生」殊榮，榮膺「雙料港男」！

蕭家浩晒「鵰功」

一直表現四平八穩，曾任模特兒的(1)蕭家浩雖先拔頭籌，勇奪由觀眾網上票選的「iMR 大獎」，加上在泳裝環節激凸晒「鵰功」，仍不幸墮入復活戰，有幸「翻生」的他最終失望而回。至於以騎呢見稱的(12)林志勇，雖然搏「老命」Chok甫，可惜臨門「跣腳」，影響分數，「食蛋」而回。而身形最Fit的(6)方世杰雖然殺入最後4強，連靚女李亞男、馬賽及劉倩婷亦撳他「鐘仔」以示支持，但仍無緣登帝座。而「最具演藝潛能大獎」則落入表演自彈自唱Rap的(3)黃建東手中。

無綫今年破天荒放寬「色戒」，除了加設男評判團及男觀眾列席外，又邀請陳奐仁任首位男司儀，偕「四大高妹」鄭裕玲、陳敏之、呂慧儀及莊思敏鬥「嘴」，雖然陳奐仁頻頻講錯嘢，但鄭裕玲仍替他護航。另外，決賽大玩「重口味」，參賽者在出場短片中被巨型拳套打至歪口歪鼻，及至中段再半裸打爆波，相當騎呢！

方世杰四強止步，但仍然贏得一班靚女支持。

蕭家浩先拔頭籌贏得網上票選的「iMR 大獎」。

李晉強仆崩嘴行運

李晉強賽後仍難掩興奮說：「好開心，冇諗過攞獎！（贏乜？）唔知，可能係做番平時開開心心嘅自己！（笑容電死女？）可能啦！」談到廣東話欠佳，早前因「跨欄」仆崩嘴的他自嘲：「可能跌崩咗個嘴啦！」並承諾會改善。至於會否來港發展，在加拿大讀書的他表示暫時不會：「返去探媽咪先，加上仲有一年畢業，讀完書先返嚟！」

(3)黃建東Rap功大獲好評，奪「最具演藝潛能大獎」。

一眾港男大晒肌肉，現場嘩聲四起。

文：影視組