諸葛漏拎銀包母情急阻機起飛
名模諸葛紫岐（Marie）早前到上海和台星楊謹華及藍正龍拍台劇《幸福三顆星》，期間更要開工連踩三十小時，並因此連手機也報銷！「拍完成個人瘟瘟哋，竟然攞住個手機去洗手，個手機即刻沖涼濕晒，好彩係新買，冇重要嘢喺入面。（有親密照？）一直都唔會影，同埋我太大頭蝦驚唔見！」
Marie笑言大頭蝦事多不勝數，最經典是有次母親送自己到機場，上機後機師突然廣播說有緊急事件暫延起飛。「廣播完機艙門打開，見到媽咪出現，我仲以為媽咪畀驚喜我一齊去旅行，點知原來佢係拎番個銀包畀我！另外，有次喺日本酒店餐廳留低機票護照，去到機場先知，好彩酒店已經送咗去櫃位。」她續說和朋友去美國旅行回程時，去到機場才知訂錯回程機票日子外，更試過把自己和朋友的機票及護照全留在自己酒店房的保險箱內，「最後所有人要搭遲一班機，我要畀晒機票差額。（試過唔見男友薛嘉麟嘅嘢？）冇，佢知我大頭蝦，佢會保管所有重要嘢。」
