曹敏莉甜爆囡囡玩單眼

前港姐冠軍曹敏莉(Mandy)昨早弄瓦,在老公Jacky陪同下入產房開刀誕下8.7磅重女兒,乳名為「多多」,英文名為Dora,Mandy稱錫完囡囡後囡囡已識得單眼回敬,那刻她覺得幾辛苦都值得,甜到漏!

曹敏莉前晚入院待產,校準時間開刀生女,對於這胎是否擇了良辰吉日進行,Mandy則未有正面回應,她表示只參考過而已。而剛開完刀的Mandy,昨於電話中的聲線聽落精神,但她表示狀態有點累,尚未能落床,不過她會親自給囡囡餵人奶。問到生囡囡是否很辛苦?Mandy說:「都係預期中嘅感覺,但辛苦在麻醉藥未過,不過我都好開心,因為生完嗰刻醫生話囡囡好健康,抱埋我心口度我錫咗囡囡一啖,佢就識得向我單眼,嗰時我覺得好甜!好窩心!成個人都滿足晒!幾辛苦都抵!」

老公興奮過度

而Mandy生產過程中,老公Jacky全程握着她手陪伴以示支持,不過Mandy則大爆老公因興奮過度而瘀事連串:「我同佢講你就嚟做人爸爸啦……Jacky爸爸!佢即刻眼濕濕,跟住佢陪我入產房幫BB影相拍片,但老公全程掛住拖我隻手,要醫生提佢先識得拍,(囡囡似邊個?)我覺得眼長長似我,但個嘴就似我老公,整體都似老公嘅,因為囡囡圓碌碌,肥嘟嘟!」

仲未改中文名

問Mandy囡囡改咗中文名未?「唔會搵師傅改啦,因為我老公都唔係迷信嘅人,其實中文名我都有兩個心水,最緊要係有意思同好聽!(再追?)暫時唔會,因為今次囡囡我會自己湊番,(老公獎咩?)唔需要啦!BB健康已經係禮品。」

文:影視組