婷婷不知姪兒身在何方
謝婷婷昨日佩戴二百多萬元的鑽飾，與男友安志杰出席Van Cleef & Arpels新店剪綵活動。由於天氣太熱，婷婷見安志杰滿頭大汗，即用紙巾為他抹汗，表現恩愛。
雖然哥哥霆鋒已回港，但婷婷表示未有與對方聯絡，更不清楚Lucas和Quintus身在何方，故拉姑終日以淚洗面，她惟有又攬又錫氹媽咪開心。問到會否一家人到陽明山莊撐阿哥？她說：「唔知呢啲，各有工作，小朋友依家喺邊都唔知。（霆鋒返港簽離婚書？）香港係佢嘅家，拍完咪返嚟囉！佢仲要拍廣告。」有傳栢芝將帶Lucas和Quintus到加拿大生活，又會去泰國耍樂，婷婷認為不是好事，覺得小朋友應在安定環境下成長。她又稱Lucas和Quintus很適合做娛樂圈，經常有機會周圍飛。
而安志杰昨日陪霆鋒一同返港，對於死黨鬧婚變，安志杰不敢多言，只表示二人在機上只談打遊戲機。問到知不知霆鋒掛住小朋友？安志杰巧妙回答：「霆鋒係好爸爸、好男人、好堅強同好聰明嘅人，總之唔係好人我唔會同佢做朋友。」但問到栢芝是否他朋友時，他即語塞說：「好耐冇聯絡。」那栢芝是否好媽媽？他又窒一窒才答：「佢應該係一個好媽咪，每個媽咪都關心自己孩子。」