張達明搵嘢噏落區攞料
「形體動作大師」張達明今個暑假終於達成夢想，殺入紅館做個人棟篤笑，日前他專誠殺落旺角，聽取民意，務求炮製一個最啱香港人睇的棟篤騷。
《張達明棟篤笑一於做壞旦消暑加料紅館版》將於七月舉行，達明對這次紅館處子騷相當重視，日前便親自落區聽取民意，他說：「雖然我已經度咗啲最熱爆嘅話題，譬如：最低工資、高官僭建、塑化劑，甚至連藝人離婚都諗埋，講吓男藝人要孭起頭家係幾咁辛酸，但係都想再聽多啲大家嘅意見，所以今日專誠落區，只要你話我知你想喺我紅館騷度聽乜嘢，我送番件tee畀你，洗碗都有最低工資，你唔能夠叫人白白用腦o架，係咪？」
望觀眾玩人浪
結果達明在旺角行人專用區一站台，即時引來本地人、內地遊客及外籍人士包圍，個個爭着舉手發言，達明事後說：「今次落區絕對值得，聽到好多市民寶貴心聲，我會認真研究，其實今次紅館騷對我嚟講有特別意義，記得我第一次表演只係得八十觀眾，究竟去到紅館面對成萬人會點呢？好期待快啲7月25開騷，我想叫觀眾玩人浪，另外，今次有特別嘢玩，我會史無前例同現場觀眾透過手機app一齊做表演，記得入場前幫部手機叉足電，約定你，紅館見！」
文：陳奕龍
攝：吳文聰