栢芝好友幫手數臭

鋒芝五年婚姻面臨決裂，醞釀多時的不可告人秘密一發不可收拾！前晚陪伴栢芝飛往德國散心的女助手Andy，乃栢芝的中學同學，跟隨栢芝已經多年，Andy在微博化名「andygaga」，於歐洲時間下午一時廿五分轉載一名Yuki Lee張貼指控霆鋒多宗罪的千字文章，對霆鋒作出諸多指控。而栢芝經理人Emily之後亦留言：「人是有底線的，單方面想維護家庭而啞忍是沒用的，到頭來只換來每天受到謝家傷害及中傷，好恐怖！」

文中指因不忍看到栢芝為了兩個兒子，受到種種攻擊都堅持封口。文中對霆鋒作出大指控，力數霆鋒的不是，更揶揄霆鋒得到「最佳男主角」是實至名歸。

點解出律師信見仔？

文中踢爆霆鋒最離譜的是：「點解要出律師信要求見兩個仔？法律上謝霆鋒、張栢芝依然是兩公婆，從來無簽過任何離婚甚至分居紙，見兩個仔寧願出律師信都唔打個電話畀老婆，究竟目的何在？」又指控霆鋒在家中不分晝夜只掛住在房打機，放假也置太太和兒子不顧，結婚多年來不跟太太多說半句話，連兒子行過身邊也視而不顧，即使兒子生病也不理會，由栢芝獨力照顧。

之前電台主持查小欣爆料，指栢芝榨乾霆鋒身家，文中亦為栢芝作出平反，指霆鋒的保母車及手上的名錶全是栢芝所送，如果她真的貪錢，毋須花錢在老公身上。並指查小欣爆料行為，全是霆鋒借媽咪拉姑把口說出來，無非是想逼栢芝提出離婚。又指霆鋒最叻利用身邊人為他做事，更重提當年「頂包」事件：「開審期間不停叫栢芝為佢做呢樣做嗰樣，一知道唔使坐監，咪即刻一腳伸開栢芝。」該博文連拉姑也被力數，聲稱拉姑對別人指栢芝無權要兩個兒子：「佢話兩個仔係姓謝，係屬於謝家，栢芝只係負責生，我真係唔明，點解作為一個媽媽、嫲嫲、奶奶嘅佢會講出咁樣嘅說話。」

霆鋒沒有放五日假期

對知情人士作出對霆鋒的種種指控，霆鋒經理人霍汶希（Mani）表示不回應，她說：「日日有唔同新聞傳言，日日有路人甲、知情人士，唔需要每樣嘢都回應，呢段時間身邊人、當事人，即使係霆鋒回應任何嘢都係唔公平！霆鋒由事件一開始已決定不回應，現階段保持緘默。（會唔會話畀霆鋒知？）唔使通知，擺晒上網係人都睇到。」

Mani在公開活動上承認霆鋒很掛住一對囝囝，但她澄清身在吉隆坡拍戲的霆鋒並沒有放假五日，她說：「佢要standby，冇得返港探仔，諗過去北京後返港，但安排唔到，七月初拍完戲放幾日就要開另一部戲。」對於栢芝飛往歐洲，相信霆鋒助手會告知他。有傳栢芝碌霆鋒信用卡，Mani表示不知道，她說：「任何事情都有一日終結，到時大家就知，依家唔使敏感。」

文：音樂組