金像影后希拉莉詩韻初嘗監製滋味，找來兩大當紮愛情喜劇女星姬赫遜及Ginnifer Goodwin演一對爭仔中女好友，上演一場男友爭奪戰！
《婚前借愛》講述瑞琪（Ginnifer Goodwin飾）與達茜（姬赫遜飾）情同姊妹，不過六年前達茜卻橫刀奪愛，縱使瑞琪與迪斯（Colin Egglesfield飾）互有好感，但亦只好為友情而忍痛割愛。而六年後，在瑞琪步入30歲大關時，竟傳來迪斯與達茜結婚的消息，更獲邀做伴娘！但她一次與迪斯把酒談天後，二人竟酒醉亂「性」，醒來發覺談天談到上床！結果點樣收科？
姬赫遜於《新娘愛鬥大》中寸嘴形象深入民心，雖然姬近作《華麗后台》及《殺慾魔警》挑戰其他片種，不過始終愛情喜劇才是姬的拿手好戲，演潑辣新娘達茜簡直易如反掌，今次於《婚》片中繼續寸人唔使本，新紮姐仔Ginnifer Goodwin今次演出鵪鶉中女亦同樣吸引。
首次當監製的希拉莉詩韻，直言一看見劇本便想起姬及Ginnifer當兩位女主角。而希拉莉亦表示今次當監製絕對不容易：「由找演員導演、到成本控制等事都要落手落腳做，唔怪得咁多得獎監製喺台上會話自己籌備一套片可以用廿年！」談到新片最大賣點，希拉莉說：「就係我哋忠於原著！《婚》改編自同名小說，我哋喺電影中只改動咗一個細節，有感動位同笑位，好似原著小說咁正！」
酒後亂性
鵪鶉中女瑞琪唔小心飲大咗，同好姊妹未婚夫兼自己夢中情人大被同眠，要喺愛情同友情二選一，今次有排頭痕！
左右為難
不過最頭痕嘅應該係迪斯，同達茜就快拉埋天窗時，又對瑞琪感覺不減，要喺呢對好姊妹中作出抉擇，咪話唔煩！
軍師出馬
三角關係已經夠複雜，仲要加埋同達茜撈亂骨頭嘅伊雲做瑞琪愛情軍師畀意見，真係七國咁亂！
雖然兩個中女係電影骨幹，但兩位男主角同樣好戲，演瑞琪愛情顧問伊雲的John Krasinski一向擅演「綠葉」角色，今次於片中為避情債扮Gay大放笑彈，不讓兩位女主角專美。而演兩女「磨心」迪斯的是Colin Egglesfield，模特兒出身及後轉型拍電視，今次進軍大銀幕，上位在望！
文：外娛組