杜如風一年使費夠買樓

身兼多職的潮人杜如風人氣旺盛，近年主力寫作出書、旅行拍特輯、擔任代言人和拍攝廣告等，當大家以為她收入相當可觀之時，她竟然自爆數口不精經常貼錢打工，她說：「我啲旅遊特輯由自己負責製作，再賣畀電視台播放。好似早前去倫敦和歐洲，無論食、住嘅使費都好貴，加埋自己忍唔住買嘢，計計埋埋都冇收入可言。」她笑言自己對錢銀沒有很大的概念，收入全交母親管理，但母親曾向她透露自己一年的使費，足夠買樓做業主！

父親入院 改變想法

其資深電影人父親杜惠東早前身體不適需要入院接受手術，令杜如風擔心不已，她表示幸好當時自己身在香港，可以經常陪伴父親，而事件令她學會珍惜與家人共聚的時間，她說：「有時自己只係顧住做嘢，都會忽略咗家人，依家做每件事都會顧及家人嘅想法，會抽多啲時間同佢哋一齊。」

斥資裝身 為見偉仔

早前她便陪伴父親一同出席香港電影金像獎，更斥資購入名貴長裙踏上紅地氈，但查實她另有目的，她說：「劉嘉玲提名影后，我點計佢老公梁朝偉都會嚟，點知佢真係無嚟！我真係好失望，不過我同嘉玲姐同一睇法，每個人生活上有遺憾，先稱得上完美嘅。」

文：影視組

髮型：Ken Hui＠Hairculture

化妝：Kathy Chow

場地、服裝：Hysteric Glamour