樂瞳揀男友唔要嫩口

樂瞳憑劇集《點解阿Sir係阿Sir》飾演反叛學生妹入型入格，火速躍升為宅男女神。除了工作不斷外，人氣急升，名利雙收，樂瞳雀躍說：「多咗好多Job，收入亦多咗，但未正式計搵咗幾多錢，總之依家每日起身有嘢做，已經覺得好開心，之前經歷過冇嘢做日子，好頹同好迷失。（怕唔怕套劇播完，人氣承接唔到？）唔擔心嘅，起碼叫做得到過，嚟緊我有拍劇，最緊要保持曝光率。」

渴望演大學生

樂瞳又渴望原班人馬拍《點》續集，她說：「希望到時可以演大學生，或者拍成處境劇都得。」她又透露在新劇《回到三國》中客串飾演馬國明妹妹，她說：「劇中我對超自然現象好有研究，但現實生活我係科學白癡，讀書嗰陣都係文科，靠死背死記。」

同拍檔唔過電

雖然事業漸有佳績，但樂瞳的感情生活，仍是一池死水，就算與「K4」三名男生朱敏瀚、羅鈞滿及黃得生，經常出雙入對，但從沒過電，樂瞳說：「真係未遇到，我都希望真命天子快啲出現，穩定時會公開戀情。（揀朱敏瀚？）唔得，佢太嫩口。（擇偶條件？）要有上進心、成熟，唔需要好有錢。（圈中人？）唔要呀，因為我妒忌心好重，怕男友拍親密鏡頭時，我會呷醋。」

採訪：戶冊平

攝影：劉智源

服裝：Collect Point

場地：gi+