何超儀天眼通高唱正能量

超儀與三位好友組成樂隊「何超 & The Uni Boys」，下周四（23日）除參與band show演出外，7月更會推出搖滾EP測試樂迷反應。

以愛犬命名

談到Uni Boys的命名，原來是來自超儀已逝世愛犬Uni：「佢同我好有緣，佢好有靈性，依家Uni Boys陪我玩音樂，就好似Uni仲陪喺我身邊咁。記得去年暑假我哋喺台灣出騷，本來我嗰日把聲麻麻地，點知一出場就好OK，我覺得Uni都喺天上面聽緊囉。」

超儀坦言以往為事業打拚，如果表演唱歌失準，心情會跌落谷底，幸得Uni Boys幾位大男孩糾正她思想：「佢哋同我講，話入錯beat、唱得唔好咪同大家講聲唔好意思囉，最緊要係自己唱得過癮啫，咁樣諗自己壓力真係冇咁大。」

對於即將推出唱片的銷量，超儀笑言：「我哋首主打歌叫《天眼通》，就好似我相信念力可以改變命運，只要你有信心，就乜都有可能，正能量好緊要，所以我哋張唱片贏面好高，只係贏幾多啫。」

自己有得着

談到這幾年超儀以念力改變命運，自豪的說：「成立電影公司啦、去到外國竟然可以同啲成世冇諗過可以合作嘅人合作，我覺得自己得着好多嘞。」與幾位朋友由純友誼演變為合作夥伴，大家已熟悉彼此性格鮮有衝突，故計劃將這份團隊精神由音樂伸延到電影，最快在年底實行。「戰友」及團長Kevin則大讚超儀夠guts：「搖滾唔止係音樂，仲係一種精神同態度，我哋今次完全冇考慮商業因素，超儀肯試真係好勇。」

文：影視組