無綫譴責《忽周》《FACE》不道德
無綫小生黃宗澤（Bosco）在家中全裸慘遭偷拍，他昨晚開工時表現無奈，承認此事已過了其底線，強調自己都有阿媽生，杏兒更無奈到不作回應，而無綫亦發聲明譴責《忽然1周》及《FACE》不道德，保留法律追究權利！
Bosco在火炭寓所被拍得全裸周屋走，「晒雀」兼露股，更被指在家中等同居女友胡杏兒收工回家「撲火」，Bosco昨晚由經理人陪返電視城拍《潛行狙擊》，被問是否心情沉重？Bosco說：「梗係唔開心，做藝人預咗冇私隱，但嗰個係我睡房，已經過晒我底線，我都有阿媽生架！」
獲胡杏兒安慰
Bosco坦言喜歡陽光入屋，且愛沖完涼赤裸通屋走，問到當時杏兒是否在場？他說：「唔喺！都唔同時間，（同居？）佢住樓上，但成日嚟食飯。」他透露就此事跟杏兒聯絡，對方也安慰他，至於有否「慶幸」沒影到杏兒更私隱的相，他表示杏兒可能平時都很小心。而杏兒則透過短訊回覆「無回應」。
無綫對該報道發聲明嚴重譴責《忽然1周》及《FACE》偷拍黃宗澤及早前的王浩信、陳自瑤的行為，強調偷拍藝員在家中甚至私人房間內的情況，屬不道德的行為，完全侵犯他人私隱，並謂無綫及旗下藝人保留法律追究權利。
陳自瑤促立法
早前與Bosco一樣被偷拍的陳自瑤，昨日怒斥偷拍者可恥，猶如強姦完人後拍人裸照再公諸於世。自瑤說：「我哋已經畀人踩到上心口！畀狗仔隊跟都算！藝人都係普通人，返到屋企都有私生活，我哋喺觀眾面前要顧形象，依家就畀呢班不道德嘅人咁影！連小小嘅私隱都冇埋，我覺得Bosco應該告佢哋！」對於無綫出聲明嚴重譴責《忽然1周》及《FACE》，自瑤多謝公司為受害者討尊嚴，但能否取得公道，就得要看政府會否處理。
Bosco老友林峯替他不值說：「呢件事係踩緊法律界，我自己就一向小心，喺屋企長期閂簾，不見陽光。」另一好兄弟吳卓羲則說：「我都係長期閂簾，我唔怕呀，畀人影都只影到我同阿媽、工人。」
文：影視組