阿Sa力撐鋒嬌兄妹情
鍾欣桐（阿嬌）無辜變小三捲入鋒芝婚變，嚴重影響聲譽，感到無奈和唔公平的她作出控訴：「還我聲譽！」英皇則發嚴正聲明斥報道憑空捏造，蔡卓妍（阿Sa）亦力撐阿嬌，強調Twins和霆鋒是好兄妹。
昨日有報道指阿嬌去年底向霆鋒主動出擊，不但在橫店拍劇時趁機探班，還半夜致電霆鋒傾心事，結果栢芝知道後極為震怒，在電話中狂鬧阿嬌，還開始對霆鋒嚴加管制云云。
「還我聲譽」
莫名其妙做了小三的阿嬌十分無奈，她接受本報電話訪問說：「當然明白呢件事好多傳媒有唔同報道、揣測，創造好多唔同故事吸引讀者。我覺得好無奈，夾硬加咗我呢個角色喺入面，對我好唔公平，自己好努力工作，一直好低調唔反駁，但今次報道對我好大影響，公司覺得要還我一個公道，所以出聲明譴責，還我聲譽。」
英皇昨發嚴正聲明作出兩點澄清：(1)鍾欣桐從未於謝霆鋒拍電影期間探班；(2)報道指鍾欣桐曾半夜致電謝霆鋒，致令謝妻張栢芝不滿，此乃純屬杜撰。英皇高層霍汶希亦在微博聲援：「嬌嬌，我們不會讓人家惡意欺負你！」霍汶希接受電話訪問說：「希望各大傳媒要有守則，報道真相，唔好為銷量捏造古仔而抹殺阿嬌努力，我好心痛。」
此外，阿Sa昨日跟男友陳偉霆出席電台活動，她力撐好姐妹：「故事一則，識我哋嘅人都知我哋係好朋友，鋒芝係我哋大哥哥大姐姐，佢哋極度錫我哋，栢芝攞護膚品會送畀阿嬌，呢啲係呃唔識我哋嘅人，公司亦發咗聲明。」
與鋒芝少見
問與霆鋒多不多聯絡？阿Sa說：「好少，佢係唔聽電話嘅人，要經助手搵。阿嬌話冇去過霆鋒探班，雜誌想拖埋阿嬌落去好睇啲！」對於鋒芝婚變，阿Sa指作為朋友不應該追問。問是否跟霆鋒friend些？她說：「唔係，同栢芝有聯絡，但我哋少見面。」
文：音樂組