張崇德撐老婆非紫荊俠
唱得兄弟張崇基及張崇德昨日舉行記者會，宣布巡迴演唱會將於8月中在Star Hall舉行，獲一眾好友撐場，又安排陳蕊蕊「獻身」教兩兄弟跳辣舞，怎料崇德彈開說：「我有家室架喇！唔好行埋嚟！」場面搞笑。
有指最近四出派錢的紫荊俠是藝人之家成員，因中了六合彩後扶貧，並指真正身份是基督教徒劉美娟、鄧萃雯、商天娥或羅慧娟！劉美娟昨日否認是紫荊俠，因平日已有做慈善探訪，不需蒙面，其丈夫張崇德說：「冇可能！我哋24小時都忙湊仔！」身在北京拍劇的商天娥亦否認：「我係好平實嘅基督徒，就算行善都唔會搞到咁趣致！」