梁慧恩上堂與男同學互摸
任節目主持的梁慧恩（Viann）畢業於香港理工大學，主修物理治療，她表示課堂令她印象深刻：「嗰時上實習課學按摩，要特登換背心短褲，有一次教背部按摩，因為女仔唔夠，我一個要對三個男仔，畀佢哋輪住按我個背脊，真係好尷尬！」
當時老師亦要求一男一女做拍檔，讓大家習慣接觸異性身體，她直言開始時並不習慣：「試過學盆骨結構，要識去摸恥骨嗰個位，但我個partner係男仔，雖然係好好嘅同學，但都驚一陣掂到啲唔應該掂嘅嘢就唔好啦，咁我就同佢講『你將冇用嘅嘢撥開先』，好好笑！不過依家諗番都係好好嘅經驗，係學習嘅一部分！」
而Viann的校園生活亦非常多姿多采，除有份舉辦講座外，還參加幹事會，搞迎新營畀學弟學妹參加：「嗰陣上莊好癲架，幾日唔瞓覺，我高峰期試過四日冇瞓，有一年玩水戰，我哋拎晒啲垃圾桶裝水，倒到周圍都係，搞到人哋啲地方濕晒，好似火警演習完一樣，嗰次之後個場唔再租畀我哋，哈哈！」她直言喜愛學校生活，現在亦十分懷念從前的日子。
理大多猛料學科
香港理工大學校訓為「開物成務、勵學利民」，校內亦有不少出名的學科，如紡織及製衣學系、酒店及旅遊業管理等，歌手梁詠琪、黃貫中、葉翠翠、DJ少爺占及阮小儀等均為該校畢業生，可謂造就不少人才。