陳法拉失手機洩密恐慌

無綫花旦陳法拉前晚身穿低胸晚裝出席手機活動，輕露「事業線」，跟以露背裝示人的徐子珊爭妍鬥麗，可謂「有前有後」！而黃宗澤、名模陳沛嘉及楊洛婷等均畀面盛裝出席。向來「大頭蝦」的法拉，繼早前在自動櫃員機記得攞卡但冇攞錢，白白損失三千港元後，前日又遺失電話，認真黑仔！

法拉一臉無奈地表示前日進行專訪時，到附近洗手間換衫，期間不慎「賴低」電話，她說：「我隔咗一段時間先醒起唔見咗個電話，再返轉頭已經搵唔到喇！」她坦言手機已set密碼，奈何現今破解技術日新月異，故擔心不已，並謂：「唔見電話就當送咗畀人，但希望執到嘅人尊重我嘅私隱！」

問到手機內是否收藏不少「蜜照」？法拉說：「冇，生活照居多，但有同藝人合照！雖然藝人嘅名用咗代號，但都擔心佢哋嘅電話流出！」笑問男友薛世恒的代號是否「老公」？她甜笑說：「唔係，用咗英文字母代替！（擔心成為林峯床照事件翻版？）唔會嘅，裏面都冇親密相！（因為『峯霜』事件學精咗？）唔關事！我不嬲都怕羞！」

文：影視組