朱永棠爆半夜 撳錢畀張父

前風火海成員朱永棠十多年前曾與張栢芝有一段情,提到鋒芝婚變,他表示亦有留意,希望兩人和好如初:「小朋友冇父母係最慘嘅!」當年栢芝獲朱永棠兄長朱永龍發掘入行,對於有指她曾當兩人是「人肉提款機」,朱永棠說:「花好多錢喺佢身上係事實,我哋用咗幾百萬捧佢!(成日問你攞錢?)當年佢屋企係冇錢喎!佢爸爸問過我哋,係試過半夜要錢,我哋都有畀佢,可能栢芝唔知呢!」現已甚少在幕前出現的朱永棠表示雖然工作多年,但賺極都追唔番蝕咗嘅錢。問到有否嬲栢芝?他說:「冇,都咁耐,好多嘢我唔會主動講,但都唔會講大話。」

對於有關張栢芝的傳聞,其前經理人朱永龍聞言後淡然回應謂:「我做經理人嘅守則,無論個藝人係好定壞,我都唔會講對方不是,況且我哋都分開咗咁耐,官司又打過,所有嘢都過咗去,無謂再提。(借過錢畀佢爸爸?)唔好難為我,真係唔想講,我只希望佢嘅風波快啲平息,前途會更好。」