陳偉霆操肌肉冧阿Sa
陳偉霆（William）昨日為泳裝騷擔任嘉賓，穿上背心沙灘褲的他大騷一身肌肉，明顯比前大隻不少，他說：「要操Fit拍電影『拳王』，六月開拍，依家夠大隻喇，導演都滿意，係極限。我每日用個半鐘跑步，兩個鐘做Gym，一日食五餐飯，搏到好盡。」問到女友蔡卓妍（阿Sa）是否喜愛他如此大隻，他說：「我相信佢鍾意，健康啲，正常大眾都鍾意偶像健康啲。（你話阿Sa當你偶像？）唔係，我係話正常大眾。」
William又笑言與眾多靚女一同行騷並不緊張，只是在後台不敢周圍望，大會亦以帳篷來遮住他。問他是否怕被看蝕，他說：「唔係，因為有十幾個女仔，得我一個男仔，本人少接觸咁多性感女士，都尷尬。（邊個身材最好？）真係唔敢望，上台前我都係耷低頭。（送泳衣畀阿Sa？）冇所謂，我好保守，會送一件頭平腳包到冚畀佢。」
