Chilam掌聲，不留戀
張智霖（Chilam）入行逾廿年，雖然與袁詠儀（靚靚）婚後仍有傳出緋聞，但二人仍恩愛如昔。眼看他的家庭及工作均非常美滿，但Chilam仍謙虛表示仍須努力。也許是這份不自滿，就是他成功的秘訣。
家庭篇 相處之道 學包容
Chilam跟太太靚靚結婚至今已跨越了「七年之癢」，他認為婚姻並不需要經營，反而是一個鍛煉包容力的好機會；囝囝慕童（魔童）已經四歲，Chilam正想方法不讓孩子患上「王子病」。
婚姻絕對唔需要經營，佢係一個學習嘅過程，練習緊自己底線。兩個人相處，你忍耐我，我忍耐你，因為兩個人冇可能百分百夾，就要學習點樣去放低同埋接受，堅持己見係冇意思。
可能你會覺得佢呢一刻好乞人憎，但你會發現呢個乞人憎無存在多過五分鐘嘅可能，因為好快會過去。我哋依家並唔係已經開花結果，其實都係一個階段。
中庸之道教兒子
我發現「王子病」呢個問題唔單止係由父母嘅溺愛造成，而係成個社會去營造出嚟，成為一個意識形態。可能喺學校、社會嘅消費模式都係咁，所以其實係非常困難令佢唔變成一個所謂嘅「潮童」。即係你令下一代唔係咁樣嘅孩子嘅話，可能又會喺香港格格不入喎，所以重點係要一個中庸之道，唔可以太過偏離，要拎一條中間線，唔可以太過曲高和寡。
希望囝囝好人緣
其實我哋依家都一路喺度學習同摸索點樣去教，冇人會識邊條路會最啱，因為個世界不停轉變緊，所以我哋要跟住呢個世界轉變、進步囉！
我覺得如果提供到一個好好嘅教育畀佢，佢可以做到一啲比較有把握、有自主權啲嘅嘢。唔好做啲咁辛苦、聽天由命同被動嘅嘢。（囝囝咁靚仔！）其實並唔係，好普通啫，希望佢人緣好啲啦。
工作篇 高峰低潮 冇壓力
入行逾廿年，Chilam於今年年頭才初次踏足紅館舉行其個人演唱會，結果反應極好，除了加場外，不少粉絲更不停追問他何時開Part2，ChiLam就謙虛表示自己只是一個提供娛樂的表演者，絕對不會過於留戀回味。
對我嚟講演唱會係一個新嘅領域，自己入咗行咁耐，但係一個咁大型嘅演唱會真係第一次去接觸，唔知人哋會唔會鍾意睇我，真係有好多唔知，但出嚟嘅結果我係好滿意，觀眾亦都收貨，呢個係一個好大嘅欣慰。
留番畀觀眾陶醉
演出始終要累積經驗，譬如今次可能跳舞未做到一個滿意嘅狀態，但下次必然會更好。完成呢次演唱會，我嘅心情就係盡快去忘記佢，作為一個藝人，或者係作為台上一個主角，我諗要盡快抽離，因為沉醉同埋陶醉係留番畀觀眾去享受，自己要快啲行前一步準備下一個Service仲好！我哋只係提供個娛樂，唔好有太多多餘嘅情緒啦！
我做咗咁多年Artist不嬲都冇乜壓力，高峰同低潮我都冇乜嘢嘅。做人唔係百分百要成功，有時可以失敗吓。譬如打牌咁，唔係鋪鋪都食得出，有時畀人截胡，有時食吓詐胡，笑吓，你一洗牌又係第二鋪，就係咁咋嘛！
做善事多正能量
成功都始終會過，同埋會過得好快，你唔好係咁執住個感覺同埋嗰個情緒就會比較自在。至於長青樹，其實我一路都改變緊，都係大家好包容啦！我好自愛，我個心態係好正面，又好識得安慰自己，可能我做好多善事，所以有好多正能量。
個人篇 越南探訪 多體會
行善為樂的Chilam認為做善事能帶給他很多正能量，亦是其保持青春的秘訣之一。他早前曾到越南探訪及幫助患有眼疾的兒童，親身體驗「助人為快樂之本」。為向下一代貫輸正確觀念，Chilam由囝囝一歲便以他的名義捐款。
今次其實係我自己第一次去越南，都親身見證咗啲小朋友做完白內障，重見光明嘅經歷，好開心！我覺得善事嘅定義其實最主要係發自內心，即係個對象係邊個冇所謂。
定期捐款
其實我唔止出力，亦係定期捐款者，今次更加親身見證到一個慈善團體所做緊嘅嘢，呢個好重要，有時你去做善事，個機構並唔係有百分百透明度畀你知道佢哋點運用我哋嘅捐獻。我已經支持咗呢個團體八年，我個小朋友都四歲，佢都有收到個獎座，都三年啦，所以做善事幫到人係一件好快樂嘅事，我希望囝囝將做善事變成一個習慣，就會好自然而然去做到。
口述：張智霖
筆錄：冰奇
攝影：沈健程
化妝：Hetty Kwong
髮型：Willie Leung@ii hair & nail
場地：ZZIP oyster, tapas and wine