高海寧chok胸收咪望變男人

高海寧、呂慧儀、葉翠翠、賈曉晨、姚子羚、劉俐等一眾女星,昨日現身九龍灣展貿《變身男女Chok Chok Chok》招募活動,眾女晒胸露腿,王友良則男扮女裝,齊為無綫金牌監製錢國偉重返娘家第一炮省靚招牌。

擁有一雙巨咪的高海寧身穿火辣低胸tube dress,露出胸前數吋事業線,但她否認性感博搶鏡,她說:「都唔係好性感啫,夏天衫好多都係咁,要見記者咪着靚啲!(身材太好難扮男人?)都唔係,我着鬆身衫扮肥仔,應該都可以呃到人,因為我本身夠高。(想做男定女?)做男仔可以擘髀坐,free好多,做女仔始終要斯文啲,我希望公司畀機會我演啲反串角色。」

王友良遭「非禮」

以女裝示人的王友良,惹來呂慧儀為首的一眾「女色狼」揸胸偷襲,他說:「我用咗兩個幾鐘去搞呢身打扮,我估個假胸係王祖藍用開嗰個,我仲未敢自己影相留念,因為我都接受唔到,我冇易服癖,係錢國偉搵我,我覺得都幾好玩,咪試吓,只此一次。」

絕非鼓吹易服癖

監製錢國偉則不擔心節目被指鼓吹易服癖,他說:「中國京劇都有男扮女,都唔係鼓吹。(准變性人參加?)個節目想參賽者打扮成另一性別,但準備變性或已變性者偏離咗節目原意。(陳志雲搵你返無綫?)陳生同曾醒明都有搵我傾,依家同TVB係合約形式,仲傾緊新一輯《美女廚房》,唔傾長約因為我出面有嘢做。(搵崔建邦合作?)我知佢同曾志偉傾緊啲電影嘢。」

無綫電視外事部副總監曾醒明則說:「無綫喺九龍灣展貿租咗地方做town studio,場地名稱tvbuddy@E-Max,陸續會有節目喺度做,一來電視城地方唔夠用,二來想方便市民現場參與。」