祖兒立心外闖效法何詩

Joey前晚一身火紅色動感戰衣，聯同鍾舒漫、洪卓立、林欣彤及羅孝勇、何雁詩、謝東閔等一班「巨聲幫」，齊齊現身小西灣運動場，為《第三屆全港運動會開幕典禮》揭開序幕，雖然戶外演出撞正微微雨，但打頭陣的Joey仍落足心機傾力演出。

未比賽先抽筋

Joey說：「我係呢次運動會嘅宣傳大使，可能大會睇中我鍾意運動同活力一面，所以搵我唱主題曲《人人起勁》，係呢個運動會第一次有主題曲。我細個已經鍾意打羽毛球，讀書都參加過4x100接力，但熱身過度，未比賽已經抽筋。（好友何韻詩入圍台灣金曲獎？）真係唔容易，恭喜佢，去台灣發展能夠攞到好成績，睇住佢努力，連宣傳都參與埋，身為香港歌手都覺驕傲。（送咩禮物？）之前佢生日我都冇送，遲啲夾埋送份大嘅。（你想提名金曲獎？）我做觀眾做咗好多年，下年會出國語碟，公司、屋企人、朋友都想我去外面發展，既然我喺香港都站穩陣腳，我都想去外面吸收新嘢。」

何韻詩	鍾舒漫及洪卓立與師姐一起出席活動。	祖兒出場時突然下雨，但她仍落力演出。

期待喜劇出街

至於林峯獲專車直送至會場門口，他說：「係大會安排，可能我唱closing，呢個時間到，外面冇晒車位。（無綫急調你套《回到三國》做台慶劇，鋪路你攞視帝？）年年都係咁傳，一年傳得早過一年，個劇仲有好多後期要做，一定趕唔切。（為你破例開快車？）唔好玩我啦！（恨唔恨攞視帝？）冇人唔想攞獎，但最緊要個劇出嚟觀眾鍾意。我自己就好期待同佘詩曼套《花花世界花家姐》，因為我比較少做呢類喜劇。」

文：影視組