黎明划艇行善雙倍奉還
黎明（Leon）昨早現身白石角碼頭，親身上陣為無綫慈善節目划艇籌款，雖然剛從內地拍戲回港，兼且只睡了六個鐘，但Leon為慈善落足力，划到大汗疊細汗。
Leon落水划艇前，被問到信心如何，他即妙語一番說：「之前傾玩踩單車、打保齡，但乜都做過晒啦，划艇幾好，ＴＶＢ畀相我睇，隻艇好『肥』，點知真身原來咁細隻，成隻賽艇咁。我以前都有游水、滑水，後來少玩咗，本來話要划五百米，後尾都改成四百米，我天分唔高，但求唔好反艇，其實反艇冇乜嘢，就反就反救艇嗰吓最痛苦，為咗呢次籌款我特訓六個鐘。（打晒底防濕身？）冇打底喎，我都冇預會反艇！（練咗六個鐘信心十足？）真係練足六個鐘咩？抖都抖咗四個鐘啦！」
量力買樓正常投資
Leon更出動豪華遊艇方便上落他口中所說的「賽艇」，他說：「遊艇唔使買，問朋友借咪得囉，最緊要有借有還，再借唔難！（雜誌話你斥逾億元上水買樓？）我啱啱喺內地返，未睇報道，冇回應。好多香港人都有買樓潮，我就冇嘅，（有冇買樓？）都係正常投資，量力而為，我覺得做人最緊要活得開心，知足常樂，投資係在所難免，始終銀紙係會貶值。」
結果Leon不只順利划畢原定計劃的四百米，連同為遷就拍攝需要而多划出的四百米，合共划了八百米有多，難怪烈日下划到身水身汗的他，多次掏出手巾抹汗，令岸上圍觀的粉絲頻頻尖叫。
李詩韻屁股位尷尬
另外李詩韻、張秀文及張慧雯等昨日亦為節目的跳舞環節作綵排，其中詩韻更會表演高難度動作，於跳舞環節中表演凌空「大」字馬，她謂：「對手要託起我，我個屁股喺佢個頭附近，見到個位都覺得有啲尷尬。」詩韻表示尚未知道表演當天的服裝性感與否，但她說：「希望密實啲啦，因為啲動作都幾大膽。」
文：影視組