鄧紫棋見家長在望破戒狂食

G.E.M.(鄧紫棋)的三場處女紅館個唱進入最後備戰階段,禁食而成功減磅的她,破戒狂食以其演唱會命名的日本菜,剛巧台灣歌手林宥嘉默認其女友身份兼承諾有機會便帶她見家長,因而令她心情靚爆?

G.E.M.將於本月14至16日舉行演唱會,為搣「肉女」之名,每天僅以烚椰菜、幾塊薄牛扒、麥皮等低脂食品果腹,她說:「其實我好耐都無食飯嘞,因阿媽去咗大陸照顧阿公,我唔識洗米煮飯。」

幸好G.E.M.日前在酒店誠邀下,終可狂食以其演唱會命名的「60分鐘JAM『G.E.M.』演唱會定食」,她笑說:「每款菜都係用我最hit嘅歌命名,好似有《All About You》小碟、《A.I.N.Y.》吉列蝦、《想講你知》鰻魚浦燒、《我的秘密》吉列雞扒等,我覺得好榮幸,細個嗰時我成日玩煮飯仔幻想開餐廳,依家夢想成真,首十個惠顧fans仲有我個簽名送!」不過G.E.M.這個夢只可以發三日,其演唱會完畢後,此餐亦會取消。

笑言愛上姜大偉

試食期間,G.E.M.以金魚嘴狂吞鰻魚、豬扒及蝦!問她可擔心再變肥?她含住蝦搖頭說不會:「我鍾意邊睇劇邊跑步,之前我鍾意咗《女拳》入面嘅黃飛鴻(由姜大偉飾演)。」問她為何不看緋聞男友林宥嘉?她甜笑:「佢都冇出DVD,我都有問阿妹借佢嘅碟聽。」G.E.M.又謂不知屆時林宥嘉會否秘密捧場,但坦言:「希望所有朋友都會嚟。」昨日她接受電台訪問,透露演唱會請來外國組合Tears for Fears的樂隊助陣。

此外,林宥嘉昨日在台灣出席新碟記者會,被問到跟G.E.M.的關係?他玩食字半默認女友身份:「我對她友(有)情。(遠距離戀情累嗎?)應該不會累,很多談近距離的,也滿常換的。(帶給媽媽看?)有機會的話。」

採訪:音樂組

場地:千鶴日本料理@紅磡都會海逸酒店