Donald 5.14浪漫娶Jan

DJ Donald(唐劍康)和女友張詠欣(Jan)將於下月結婚,自言不是天王,不會豪搞的準新郎,先後到英國及非洲拍攝結婚相,十分揼本,更請得張繼聰一家三口及明星好友做兄弟、姊妹團,婚禮定星光熠熠,絕不失禮。

37歲的Donald和29歲的Jan,結束四年多的拍拖日子成為夫婦,下月14日假淺水灣舉行浪漫婚禮,距離大日子尚有三個多禮拜,一對準新人正為人生大事作最後衝刺。

Jan透露早於去年9月分別到英國及非洲拍婚紗相:「因為Donald鍾意英國,我就帶咗晚裝同一套古典款式婚紗,佢就準備咗三套西裝。(Donald唔畀性感?)唔係,係因為我冇嘢露,但晚裝就好性感,大露背,喺非洲就主要影室內相。」

謝安琪全家出動

伴娘是Jan的圈外舊同事,姊妹團只有謝安琪(Kay)一個圈中人,Kay的四歲兒子張瞻則擔任花仔,兄弟團就有張繼聰、方力申及「伴郎」阮小儀。Jan說:「Kay出嫁時我都做姊妹,今次佢全家總動員嚟賀我。(當年組合Krusty成員活己嵐會唔會出現?)唔會,佢要喺澳洲坐移民監,但佢7月會嚟香港同我慶祝,送大禮畀我。」

花六位數覺值得

婚期逼近,Donald的心情不太緊張,不似女友會失眠,今次決定結婚,因Jan家裏發生事故,令他明白幸福並非「老馮」,Donald自稱不是大明星,不會搞超豪婚禮,但亦花掉六位數字,他笑言:「好多錢,我快死啦,講笑啫,係值得嘅。」至於Jan的胞弟張致恒(Steven)昨日接受訪問,他表示未諗賀禮,恨湊BB的他祝兩人早生貴子,還取笑準姐夫:「真係抵得諗,家姐咁男人婆,佢都要。」

文:音樂組