梁靖琪紙巾撻鼻天台漫遊
汪明荃（阿姐）夥拍王祖藍、李思捷及阮兆祥再度合作，在《荃加福祿壽探案》中，繼續出招扮嘢，於公仔箱內化身百變偵探，大放笑彈吸收視。
日前下午，四位主角加上客串的官恩娜（Ella）與梁靖琪（Toby）等人現身土瓜灣一幢商業大廈天台拍劇。劇情講述眾人研究一宗謀殺案的案情，阿姐可能因群眾壓力關係，導致頻頻食螺絲，NG了十多次。
官恩娜換拖鞋
當日天氣酷熱，當導演嗌Cut放休息時，阿姐即火速走埋一邊紓緩情緒，更急睇劇本背熟台詞。而客串的Toby亦走到工作人員身旁索取紙巾，正當以為她用紙巾抹汗，她竟懶理儀態，索性將紙巾撻在鼻上，頭岳岳四圍走與在場粉絲們合照留念，場面搞笑。
於劇中扮媽姐、偶爾化身尤物的Ella眼見有休息時間，亦走到暗角位急急補妝Keep靚樣，未幾更除掉三吋高踭鞋換上拖鞋，舒展筋骨。而王祖藍亦趁空檔頻頻講電話，似向女友李亞男報告行蹤兼傳情。
文：追蹤組