薛家燕心痛毒害食嘢減壓
莫少聰和孫興於北京涉毒案被捕，令圈中人均大感驚訝，紛紛發表感言。
薛家燕：「睇咗莫少聰條片真係好心痛，佢同孫興雖然唔係話好熟，但都識，點解會怕埋堆而要食毒品呢？呢啲嘢應該識得拒絕。老實講我冇去應酬，喺娛樂圈咁多年，知道有啲人食煙，有啲老前輩吸毒，但唔會感染到自己，任何一行都有壓力，自己靠食嘢同唱歌減壓，對啲小朋友都細細個灌輸正能量畀佢哋。」
嘉穎：識得分對錯
鄭嘉穎：「毒品嘅嘢好睇個人，自己就算去應酬都唔會吸毒。有冇被引誘過？冇喎，聽都未聽過，咁大個人，接觸啲咩嘢人可以控制，咩嘢係啱咩嘢係錯自己都識得分，選擇咗就要承擔後果，我自己啱啱同劉心悠喺內地拍完《步步驚心》，成組同事都好健康好乖。」
謝天華：「其實我同孫興唔熟，一切都係睇新聞先知。而同莫少聰就比較熟，佢出第一隻碟要表演嘅時候，我有份做舞蹈員，覺得佢幾靚仔、健康。其實件事發生喺北京，想幫都幫唔到。外面成日話娛樂圈有好多古靈精怪事發生，其實唔係，只要個人夠堅持，有宗旨就唔會被影響到。」
