祖兒就晒位冧6呎7型男
容祖兒昨日以漢堡神偷黑白橫間look出席「第三屆全港運動會」開幕禮，祖兒對202cm高的排球運動員許培德表現「嗒糖」，多次主動撩對方傾偈，又作勢將頭挨在對方的膊頭，氹得男方全程四萬咁口。
容祖兒日前獲邀為「第三屆全港運動會」唱主題曲及與部分運動員拍宣傳片，她昨日以連身長裙出席活動，即場與八名舞蹈員邊跳邊唱，將氣氛推至高峰。期間祖兒獲安排與運動員許培德分享拍宣傳片趣事，並呼籲市民踴躍支持。
由於許培德擁有202cm（約6呎7）高度，比祖兒高出個半頭，只見祖兒不停撩對方傾偈，甚至數度將頭靠近對方膊頭，非常搞笑，活動完後男方主動用手機與祖兒合照。
講拍拖唉聲嘆氣
問到是否對許培德有好感？祖兒說：「高度唔係問題，幾好吖，個頭啱啱好挨喺佢個膊頭。（矮過你唔考慮？）過火啲，不過有啲矮嘅人好有台型同霸氣，揀男朋友唔係睇高度，最緊要係心胸有幾廣闊，有先啦。（唔諗拍拖？）冇乜所謂，唔係唔搵。」隨即唉聲嘆氣，似有難言之隱。
祖兒近日為稍後在英國舉行的演唱會綵排，她說：「呢排都好多運動，成日喺屋企跳健康舞。」Fit到爆的祖兒自嘲是球類白癡，她說：「對球類活動都少少白癡，最叻係羽毛球。（負責執波？）執波都好攰o架。」
採訪：音樂組