林峯瞇眼自摸誘fans
林峯被舊愛潘霜霜「玩殘」，幸無損其超強人氣，新碟簽唱會有數百fans撐場，林峯亦花盡心思，親餵fans食朱古力、chok樣兼瞇眼，跳舞更自摸下體，難怪新碟推出個多月，就有四白金佳績。
前晚林峯舉行首張國語碟簽唱會，數百fans舉起「撐你」紙牌支持。林峯亦相當重視這「床照風波」後，首次和fans近距離接觸機會，全程施展「chok樣神功」，玩遊戲時，主動為fans揸寫滿歌詞的紙牌；林峯又親手餵fans食朱古力，還瞇住眼「呀呀聲」叫fans張口，體貼得如男朋友，心情大好的他似乎已忘卻情傷。
新碟破四白金
林峯在簽唱會演繹了潘霜霜表示聽到喊的情歌《讓我愛你一小時》，深情的他唱到頸紅兼現青筋，至於唱另一快歌時，更兩度自摸下體，睇到fans尖叫。司儀報喜指林峯的國語碟推出個多月已達六萬張，即場頒發四白金唱片。
問到林峯情傷心情可平復？他表示OK，非常、非常感激fans的支持，有傳他「愛情失意，事業得意」，他笑說：「一路上都全心投入工作，每個人都有成長階段，繼續喺事業上拚搏。」問他是否自己揀《讓》歌？他指是個多月前已定的第一、二主打歌，對於潘霜霜指聽這歌至落淚？林峯說：「本身係幾好嘅歌，所以多人鍾意。」他補充說會全心投入工作，不想影響身邊同事或阻礙進度。
否認緊張標汗
問林峯可需往大陸宣傳新碟？他指正趕拍《回到三國》劇集，尚未知何時煞科，加上新碟的大陸宣傳已完，故毋須再返大陸，有指他和舊愛應無緣碰面？他「吓」一聲說：「唔會，各有各發展，唔好提佢，做自己。」又着傳媒勿再問類似的問題，他否認做訪問時心情緊張致滴汗，全因他剛跳舞兼是大汗之人。
採訪：音樂組