肩係靚
女人天生最大殺傷力是與生俱來的線條美，每個女人都很懂得睇時機運用這種武器，無分季節與天氣。而近期眾女星齊齊「膊」出位晒香肩，全都以單膊與斜膊裝迎戰，但能否散發出骨子裏的性感？形象指導張學潤（Nel Nel）認為都要視乎整體的配合，唔係「膊」到盡就稱得上靚，李心潔就最能成為靚膊女王，將「簡潔就是美」演繹得無懈可擊，相反陳喬恩就因一對笨重的高跟鞋與古裝頭破壞了整體美感！
李心潔
高貴得體又有時代感，一般晚裝裙好易令人着得成熟，相反佢着得唔會太女人，加埋佢個樣清新，唔會有太多首飾，各方面都配搭得恰到好處。
陳喬恩
本來條裙好靚，配合埋佢本身氣質，唯一係佢對高跟鞋唔夠高似ＯＬ，而且款式笨重又冇美感，加埋民初髮型，破壞成件事。
夏文汐
身形keep得好好，有氣質又有一種成熟風韻，身無配飾，簡潔清雅又穩陣。
徐熙娣
條裙嘅款式簡單，尚算合格，加上佢個膊位又靚又夠直，整體線條都好好，令人睇得舒服。
陳嘉桓
雖然有個靚膊，但就着錯裙，條裙下半身兩邊袋款設計有啲多餘，破壞整體觀感。
林夏薇
條裙好有動感，可惜襯錯鞋，感覺太厚皮，相反襯對幼帶高跟鞋，唔一定要open-toe款式，已經夠靚。
Mandy Lieu
開衩晚裝裙好靚，健康性感之餘又不失華麗，但美中不足就係腰位唔夠貼，線條唔能夠突出佢嘅苗條身材，嘥咗佢嘅身形。
瑞莎
着斜膊裙都係想騷香肩，佢應該將髮型放埋一邊或者梳起頭，可以突出佢嘅鎖骨位。
詩雅
條裙加埋個古老髮型，整體感覺古怪，我覺得條裙可以再短啲，可以凸顯佢嘅修長美腿。
陳敏之
好有種女人味，佢纖瘦高挑嘅身形要carry斜膊裝輕而易舉，令一身打扮好有時代感，完全好啱佢。
單膊與斜膊很hard-to-carry，更是膊橫者剋星，屬闊膊者切勿死心住，因為Nel Nel就有方法教你如何去化解！粗幼帶可拉闊收窄膊位比例，如果膊位闊應選粗帶，因為可以收窄膊位；相反膊位窄應選幼帶，因為可以拉闊膊位，兩者都是因視覺上交錯而帶來修飾之效！