陳奕迅演活老套男
陳奕迅（Eason）在英皇電影《隱婚男女》中，收起平日跳跳紮，改以老套髮型加金絲眼鏡示人，獲導演葉念琛大讚演活了寫字樓老套男。Eason說：「難得可以演西裝友，感覺好新鮮。（鍾意咗做白領？）唔係喎！我最鍾意係唱歌同演戲，可以鍾意到連續開幾日工都唔攰。」葉念琛則大讚Eason一出場就耳目一新，不過會在劇情中安排他慢慢變型。
此外，無綫日前發表的收視調查指亞視上周六播出的《觸動．陳奕迅》只有三點收視，昨日亞視作出大平反，亞視發展及對外事務高級副總裁鄺凱迎說：「無綫嘅CSM調查話《觸》只得約19萬2千人睇，但香港大學民意研究計劃『電視觀眾研究』資料就指有92萬6千觀眾，亞視唔係要向陳奕迅交代，而係想對佢公平，個節目好有心機做，佢都好鍾意，希望TVB專業啲，唔好中傷亞視。」