林峯受情傷上昂貴一課

潘霜霜日前突然現身香港，殺傳媒一個措手不及外，相信最愕然的是林峯，他昨早如常出現電視城化妝，準備往南生圍拍攝《回到三國》外景，被問到舊愛忽然殺到，阿峯謂：「我冇睇過任何報道。（唔想影響心情？）唔係，只覺得要集中精神工作啫。（佢話之前根本冇分手喎。）唔回應嘞。（你喺西環買樓避霜霜？）好多嘢我都只係喺人哋口中知咋，有時啲報道睇完，都要自己分析吓。」

拒送戒指冧女

至於潘霜霜直指林父及樂易玲「棒打鴛鴦」，阿峯謂最怕就是令身邊人擔心。事情發展到如此地步，是否上了昂貴的一課，他直謂：「自己係成長咗，不過其實每年喺工作同人生方面，都會有唔同嘅體會。」其後他駕車往外景，開工期間與工作人員有講有笑，似乎心情不錯，不過忽然有救護車到場「贈興」，原來有遙控模型飛機「失控」撞向一工作人員，受傷後報警。與此同時，阿峯昨於網誌內有感而發，表示自己不會輕易送戒指給女孩，意味不隨便向對方作出任何承諾。

早批必定玩完

樂易玲於查小欣電台節目內受訪，指阿峯曾非常雀躍地介紹潘霜霜予她認識：「佢好dry，都知佢恨拍拖嘞，畢竟佢年紀都唔輕，不過當時我已知道係唔適合嘅時間，亦覺得會出事，其實圈中人同圈中人拍拖，係要好小心經營嘅。（諗住點拆彈？）佢（指潘霜霜）自己有打算同鋪路嘞。（教訓林峯？）唔會，唔可以喺傷口上再灑鹽。」談到陳鍵鋒指無綫為數十元薪酬與她拗數，樂易玲謂：「咩呀？係幾十個巴仙喎，佢記錯咗呀？」

文：影視組