偉仔忙爆 嘉玲欲陪爭獎
梁朝偉近期長駐內地拍戲與太太劉嘉玲聚少離多，稍後他接拍麥兆輝執導的新片，估計要在上海逗留一段時間，難怪即將角逐金像獎影后的嘉玲隔空向偉仔撒嬌，希望夫婦檔上陣行紅地氈，還說：「偉仔唔係好着緊我攞唔攞獎，佢心中我已經係最好的。」認真肉麻！
偉仔完成王家衛的《一代宗師》後，即投入另一部新作《大魔術師》的拍攝工作，忙得不可開交，貴為影壇搶手貨的他，已落實接拍由麥兆輝執導的五、六十年代背景間諜新片《聽風者》，預計於暑假尾開拍，並到上海取景。
物色一線女星苦惱
雙方自2006年《傷城》後再度合作，麥兆輝坦言非常期待，不過他正為挑選女主角而煩惱：「要配得起偉仔，當然要搵一線女星啦！但係我仲未有頭緒，未決定到用邊個好。」大抵偉仔近期常留在內地開工，與嘉玲見面時間少之又少，他又落實將再赴內地開戲，嘉玲預料有排心掛掛，故前晚她現身時裝活動時，亦表明恨偉仔返港與她一同出席17日舉行的金像獎。
嘉玲在應屆金像獎中憑英皇電影《狄仁傑之通天帝國》角逐影后，前晚她以一身紅色晚裝出現，對於頒獎禮日子逼近，笑言仍未揀好戰衣，提到爭獎心情時她說：「我當係個好玩嘅派對，不過朋友就好着緊囉。（偉仔呢？）唔係好着緊，因為佢覺得我係最好。（咁你喺佢心目中又係咪the best？）當然啦！（佢會陪你嗎？）都爭取緊。（一齊去信心會唔會大啲？）都冇咩分別，佢喺度張相咪靚啲囉。」
直認想演東方不敗
有傳嘉玲想演「東方不敗」角色，她直認不諱：「其實都唔係有特定人物想演，只要角色感動到我就想做，醜嘅癲嘅都冇所謂，最重要睇角色。」她有份演出的《讓子彈飛》票房不俗，嘉玲會否接拍第二集？她說不知導演會否開拍，若然真的成事亦想參與，更望有分紅。
文：影視組