陳沛嘉試鞋 劉思惠服侍周到

前英皇3T成員劉思惠於娛樂圈發展平平，早年索性退出娛圈做個平凡人，改頭換面於中環一間名牌鞋店做全職Sales！日前名模陳沛嘉剛巧現身閒逛，前者見對方是圈內人不但未有難為情，更表現專業，全程服侍周到，還踎低為對方試鞋！
陳沛嘉（左）進入店內睇鞋，遇上當店員的劉思惠。
陳沛嘉（左）進入店內睇鞋，遇上當店員的劉思惠。

當日下午，略施脂粉的陳沛嘉（Balia），以一身型格造型現身中環行逛，未幾見Balia走進一間鞋店睇鞋。迎面而來向她打招呼兼介紹新到鞋款的售貨員，正正就是退出娛樂圈多年、早前被發現於中環名牌鞋店做全職Sales的前英皇3T成員劉思惠（Maggie）！

表現專業冇尷尬

曾經於Ball場碰面兼有兩句偈傾的二人相遇後於店內有傾有講，雖然昔日同場耍樂嬉戲，現今變成為對方服務，但現場所見，Maggie仍然表現得相當專業，未有半分尷尬，更不時為對方提供專業意見及為對方幫眼。而Balia亦十分相信Maggie的眼光，頻頻於揀鞋期間向對方徵詢意見，足見二人相當投契，傾得非常開心！

劉思惠踎低為陳沛嘉試鞋，服務周到。
  • 劉思惠踎低為陳沛嘉試鞋，服務周到。
陳沛嘉試穿新鞋，左照右照。
  • 陳沛嘉試穿新鞋，左照右照。
陳沛嘉穿上新鞋，跟劉思惠研究一番。
  • 陳沛嘉穿上新鞋，跟劉思惠研究一番。
前3T成員（左起）：鄭希怡、蔣雅文、劉思惠。（資料圖片）
  • 前3T成員（左起）：鄭希怡、蔣雅文、劉思惠。（資料圖片）

踎低為對方試鞋

經過一輪精挑細選後，Balia便告知合適尺寸予Maggie，方便試鞋。醒目的Maggie亦不敢怠慢客人，急急到身後的貨倉拿出三對鞋款讓對方檢視之餘，更全程踎低為對方試鞋，認真服侍周到！不過當笑容滿面的Balia瞥見有記者在店外時，即面色一沉，更連鞋都唔買，火速拎袋走人，難為Maggie還全程細心服侍，殷勤非常！

文、攝：追蹤組