橫間道
潮流是一個circle，興完呢樣就興嗰樣，再新奇都只不過是循環，無可否認，圖案可帶來視覺上享受，格仔、圓形、花花等，但數到今期之冠，非橫間莫屬。橫間有粗、幼之分，是一種令人又愛又恨的圖案，愛「它」是因為可着瘦人、恨「它」亦是因為易着肥人，而近期一眾男、女星均齊齊間條上身，美感卻不同，而星級形象指導郭慶彬（Ricky）就大讚諸葛梓岐色彩取勝！
官恩娜
綠花啡白橫間吊帶裙本來色調唔易着得靚，加埋對啡色暗蛇紋open-toe，由頭到腳圖案太過雜亂，而且髮型蓬鬆，就算露出一條深長事業線都毫無睇頭。
袁詠儀
橫間長身tunic好易着肥人，雖然內襯黑衫黑褲，卻未能有效修飾身段，相反配番條幼belt來凸顯腰線，就更能修飾身段，不至於似大肚婆。
陳司翰
一身運動服本來就係最穩陣打扮，無奈錯配橫間polo t-shirt，兼又太陽眼鏡又冷帽，too much得太過MK look，如果襯番件淨色白T恤，會更加順眼。
諸葛梓岐
橫間長裙色彩夠繽紛搶眼，而且簡單地襯上涼鞋，富有夏日色彩之餘，飾物點綴恰到好處，青春可人，簡直完全冇出事位。
陳偉霆
紅白橫間polo恤外披窩釘外套，而下身襯黑色褲，將原本斯文感覺頓顯得富型格，若然再加上皮手帶，會rock得更fashionable。
鍾嘉欣
紅白橫間外套襯上白t-shirt效果平凡，改襯黑色skinny jeans，有上下呼應感覺，會更新潮。
周嘉玲
橫間t-shirt外襯上黑色圓領皮背心，簡單營造出潮味感覺，將原本casual的t-shirt即時變得有型，有畫龍點睛的效果，係潮媽之選。
顯瘦秘訣
要揀橫間衫，幼橫間比粗橫間更能着廋人，顏色方面，深色就容易handle啲，而且視覺上亦會瘦啲。至於剪裁要揀啲修身設計，否則會肥上加肥。此外，着橫間衫想身形比例嘅效果更佳，簡單一條belt已經可以修飾身段，切記橫間唔好配襯其他花巧圖案，以免睇到眼花繚亂。
星級形象指導郭慶彬（Ricky）曾與一眾女星名模如李冰冰、吳君如、樂基兒、熊黛林以及周慧敏等合作，早前更到巴黎出席時裝周。