蔡楓華問歌迷借錢死都入紅館

前晚蔡楓華終完成三場Star Hall的演唱會，尾場更獲不少圈中人捧場，可惜「信心過龍」的他在台上表現緊張得脷兼唱錯歌詞，並三番四次說要到紅館開騷，更誇下海口說：「如果唔係紅館，畀幾多千萬、億萬我都唔唱，那管係唱一場，之後唔唱『告別』都得！」

不過，蔡楓華呢頭話自己會投資，嗰頭向台下歌迷借錢：「每位歌迷借住一萬蚊畀我，我從來唔同人借錢，今次真係要借，就算餓死唔食飯都要去到紅館，一剎那光輝就係永恒，我就係要嗰一剎那！」之後更咆哮大喊「不入紅館誓不為人，2012紅館見！」

企在台上的蔡楓華竟向嘉賓借錢：每人借一萬蚊。

孫敬安、盧敏儀一直仆心仆命幫蔡楓華完成個唱。

呻宣傳多辛苦

在慶功宴上，問到蔡楓華不入紅館誓不為人？他謂：「係！人哋唔贊助咪自己開囉！（所以要公開借錢？）如果真材實料實有投資者。」他更聲稱自己已入紙申請紅館檔期，更相信歌迷籌到錢讓他開騷。

90後陳嘉桓前晚是蔡楓華的座上客。

蔡楓華身邊有不少好友，慶功宴亦邀得洪欣陪同。

訪問時他又自我陶醉，閉起雙眼邊飲水邊「頭擺擺」，莫非飲水都醉？他表示自己沒氣力，拚埋這場是為了報答盧敏儀同孫敬安，又大喊宣傳多好辛苦。問到可覺對一路幫他的孫敬安和盧敏儀夫婦忘恩負義？他即言：「唔好再講呢四個字，我係有情有義！」

反口要收歌酬

至於出心出力的孫敬安對蔡楓華稱自己開騷，孫敬安則踢爆說：「係大名答應幫佢搞，咁蔡楓華要求我都幫嘅。（佢打完齋唔要和尚？）咁佢台上有問我做唔做，我坐係控制台點頭，佢睇到啦。」

有指蔡楓華坐地起價加歌酬？孫稱決定開個唱時，蔡楓華稱不收歌酬都願做，之後反應好他說要歌酬都很合理。至於蔡楓華開第三場是為了報答他？孫坦言：「如果第三場唔收錢就係報答，佢第三場加咗50%歌酬，報唔報答見仁見智。」孫敬安指數十萬歌酬已付清給阿Ken，相反自己一分錢都未收，因要等票房計數，4月中才收回200萬飛錢。

文：音樂組