張敬軒床戰Bra女標汗

張敬軒跟關智斌(Kenny)的「密友」關係令人疑幻疑真,早前更有傳軒仔與Kenny「友變」而患上情緒病;日前本報拍得軒仔笑瞇瞇偕男助手現身中環掃男裝,全程容光煥發,反之面對僅穿性感內衣的索爆女模則標汗入定,軒仔果然是異性相「拒」!

軒仔早前被盛傳情緒病復發,令身邊一眾好友甚為擔心,不過日前軒仔與戴Cap帽的男助手現身中環名店閒逛掃貨時,一副自得其樂的模樣,縱使知道有記者在場仍笑笑口任影唔嬲兼有問必答。現場所見,軒仔甫進店內即滿場飛,恤衫、冷衫和西裝褸樣樣左拼右拼,未幾更即席試鞋並走到鏡前打量一番,步出店後,記者上前問他購買了甚麼?他說:「冇買呀,拎番對鞋嚟換咋!」心情不俗的軒仔相信被指復發的情緒病已不藥而愈。

遭導演呼喝

而日前,軒仔為新歌《壯舉》拍攝MV,為配合意識大膽的歌詞,導演找來一位火辣混血女模穿着性感內衣平躺床上,並要求軒仔將整個身子壓在對方身上,軒仔即猶如機械人一樣不敢妄動,最後要導演呼喝他,軒仔才以繃緊的表情動作輕輕壓在女模身上,相比軒仔,首次演出「床戲」的女模不但表現專業大方,雙方最後拍了三次導演便收貨。

外國人開放

事後軒仔揮汗死撐:「其實我好鎮定,又唔係自己除剩內衣,所以唔算尷尬,可能外國人開放啲,見到佢咁豁達我都唔再尷尷尬尬,同埋拍嘅時候要咪嘴唱歌,淨係掛住背歌詞都冇乜機會亂諗嘢!」除了激情對手戲外,軒仔亦被對鏡頭擺出陶醉樣所考起,最後導演改為要求他閉起雙眼唱歌,令軒仔鬆一口氣。

文:音樂組 攝:追蹤組