代代木狂掃古物 糖妹踎地尋寶講價出位

新一代「宅男女神」糖妹(Kandy)殺入日本東京跳蚤市場,狂掃二手古物外,還「入鄉隨俗」不顧形象蹲地講價,結果細細粒的她竟將心頭好講到平「一舊水」,認真威水!

早前組合糖兄妹成員糖妹Kandy飛往東京睇騷,雖然她於當地發生大地震時已返港,但她亦有為災民祈禱,還表示親身感受到日本人除了防災難意識強外,而且還非常環保。

平到你唔信

於3月初的星期天,Kandy殺入東京市內代代木公園的跳蚤市場,狂掃二手古物,她說:「日本每逢星期六、日都會喺唔同地方嘅公園舉行跳蚤市場,日本人就將佢哋嘅衫褲鞋襪、家品、精品等等,總之仲覺得有用嘅嘢都拎出嚟賣,一方面可以將舊物換錢,另方面又可以環保,價錢真係可以平到你唔信,超有尋寶Feel!」

糖妹指其實大部分貨物都很新淨,而且他們還會將衣物洗淨好才出售,所以她在「尋寶」期間,亦不顧形象踎低摷來摷去,不消一會就被她發現「寶物」。

瞄準復古篋

糖妹興奮地說:「我對呢個復古篋真係一見鍾情,無論佢嘅外形、皮革用料同顏色真係好靚,而且啲掣仲未壞,價錢都係為港幣500蚊,我覺得好抵。」不過Kandy雖然話物美價廉,但她亦有「入鄉隨俗」同物主講價,結果憑其三寸不爛之舌,成功由500元壓到400元,講價認真有一手。

文:專案組 

攝:唐豁莊 

服裝:Collect Point