林峯預咗陸續有嚟

面對床照風波仍要開工的林峯,昨日因與潘霜霜的第二批親密「咀嘴」照亦曝光,因而遭大批傳媒追訪,對此他坦言:「一開始就預咗!」至於自稱匿埋北京的潘霜霜,於電話中表現委屈,強調對有關相片表示毫不知情。

林峯與內地性感女藝人潘霜霜繼之前的「床照」被刊登後,一如之前大家所料,昨日繼續流出第二批「咀嘴」相,更指兩人實情未分手,不過昨日返電視廣播城準備開工的林峯心情似乎比之前好了不少,問他有否看過雜誌時,他說:「冇睇,但有朋友同我講咗,冇嘢呀!都係一段美好回憶,曾經真係拍過拖,講乜都冇所謂,唔會回應任何嘢,身邊朋友知乜嘢事就得。」問他有否再受打擊,他謂:「咁又冇,一開始有咁嘅事已經預咗。」對於會否擔心之後會有更激照片曝光,他只謂想專心工作。至於有否後悔錯愛對方,林峯不想評論,只想努力工作。

外景天不作美

之後,林峯隨外景車與工作人員到錦繡花園附近食麵,又到南生圍為電視劇《回到三國》拍攝外景,再問他感情是否完結,他坦言:「係,即使再有新相都唔回應嘞!(3月14日是否一齊?)唔回應咁多,(情緒有否影響?)盡量唔被影響,(邊次hurt啲?)冇話邊次。等了大半小時,由於天公不作美,拍攝被迫取消,離去前林峯表示會返家吃飯及去跑步。

聲似委屈推戲

而記者昨日致電給潘霜霜,對於第二批相片流出,她反問記者是怎樣的內容,當知道相片乃「咀嘴」相時,她即以好委屈聲氣答:「這件事令我好傷心,都推掉很多部電影,(啲戲有乜導演、演員?)我不方便說,免得說我宣傳,現在我很慘,於北京躲起來,我要靜一靜。」

此外,林峯經理人Candy又於微博代抱不平:「選擇沈(沉)默並不代表我們理虧,只是不必再在這件事互相傷害!」Candy更暗示有人搞是搞非:「傷害你曾經愛過的人而令自己上位,你以為自己成功了,其實你很可悲!」

文:影視組